Gastrektomia Vertikale
Transformoni jetën tuaj me procedurën tonë të gastrektomisë. Përqafoni një jetë plot shëndet dhe vetbesim duke hequr jo vetëm kilet e tepërta por kufizimet dhe pasiguritë tuaja.
Çfarë është gastrektomia vertikale?
Në kirurgjinë e mëngës gastrike, në anglisht “sleeve gastectomy”, stomaku ngushtohet, duke e prerë vertikalisht për të formuar një tubul rreth 80-120 ml në vëllim dhe duke qepur murin në anën e reseksionit. Është një ndërhyrje kufizuese me efekt të dyfishtë: rrit ndjenjën e ngopjes dhe pakëson oreksin. Gjithashtu pacientët tregojnë më pak interes për ushqimin.
Përse kirurgjia e mëngës gastrike ?
Kirurgjia e mëngës gastrike (sleeve gastrectomy), aplikohet laparoskopikisht.
Kirurgjia laparoskopike është një kirurgji minimalisht invazive, që realizohet me ndihmën e incizioneve (prerjeve) të vogla. Kjo realizohet me ndihmën e një instrumenti, i cili quhet laparoskop. Ky instrument përmban një kamera dhe burim drite në mënyrë të tillë që kirurgu të shohë brënda trupit pa nevojën e prerjeve të mëdha.
Cilat janë avantazhet e kirurgjisë laparoskopike?
- Shenja të jashtme minimale
- Qëndrim më i shkurtër në spital
- Më pak plagë të brëndshme
- Plagë që shërohen më shpejt
- Më pak dhimbje
- Rikthim i shpejtë në aktivitet
Paraprakisht
- Ditën që kryeni konsultën me kirurgun duhet të informoni atë nëse jeni alergjik ndaj ndonjë medikamenti si dhe ti referoni atij nëse jeni duke marrë ndonjë medikament për arsye shëndetësore të cilat mund të influencojnë kryerjen e ndërhyrjes kirurgjikale;
- Disa ditë përpara operacionit do të kryeni një sërë ekzaminimesh pre-operatore të cilat informojnë stafin mjekësor mbi gjendjen tuaj shëndetësore përpara kryerjes së operacionit;
- Të paktën dy javë përpara operacionit duhet të ndërprisni marrjen e barnave me përmbajtje Acid Acetilsalicilik (si për shembull Aspirina, Vivin C, Kardiospirina etj.) si dhe marrjen e antikoagulantëve oralë. Ndërprerja e ndonjë terapie për arsye të operacionit duhet konsultuar paraprakisht me mjekun tuaj që ju ka përshkruar terapinë;
- Duhani duhet të ndërpritet të paktën dy javë përpara ndërhyrjes;
- Pacienti duhet të ketë bërë dush, të heqë produktet xhel apo manikyr të thonjve ditën para operacionit si dhe të mos konsumojë ushqime apo lëngje të paktën tetë orë përpara ndërhyrjes;
- Rekomandojmë që pacientët ditën e operacionit të paraqiten me veshje komode me kopsa ose me zinxhir.
